Manchay Puitu
(Caverna Tenebrosa)
Uj kkata kusiyniy kajta
Mayqen jallppa mullppuykapun?
Saqerqani qhallallajta,
Sajra vayrachu apakapun?
Purisqan pallani,
Llanthunta máskkani.
Kikin pay llanthuykuwanchu,
Waqayniypaj ayphullanchu?
Mosqochacus mucchaykuni,
Ttukuni chay, rimaykuwan!
Musphani ichas, pay rikuni!
Kkanchasqaj phavaykamuwan.
Wañuchikuymanchu?
Phiñakuwanmanchu?
Wañuchikuspa qayllayman,
Astawanchus karunchayman..
Ppanpasqannijta jasppini,
Waqaspa paran paranta;
Unuyanchus jallppa nini
Máskkarqonaypaj uranta.
Noqan mayllapipis,
Jallppaj sonqonpipis,
Noqalla munakusqayki,
Sapallay wayllukusqayki!
Aswan qqoñi samayniywan
Phukuykus kutirichisaj,
Ojllaykusaj, mucchayniywan
Alliyman rijccharichisaj.
Mana chayri, jamuy,
Muyuj wayra, usqamuy;
Laqhayayniyki upiykuwachun,
Ukhunpi chinkachiwachun
Waqayniywan joqqochasqa,
Khuyaj jallppa, qhataykuwayku;
Karqaykumin ujllachasqa,
Ujllañapuni kasqayku.
Noqa tuta kani,
Cchintamin munani.
Llakiy kani, yuyayniyta
Munani chinkarichiyta.
Tullullantapis sikkisaj
Ojllayniypi kakunanpaj;
Quenamanmin tukuchisaj
Waqayniywan waqananpaj.
Janaj pachamanta,
Lliphipej chaymanta,
Paymin sina wajyawasqan?
Manan!... Quenallay waqasqan!
Autor: Jesús Lara
Texto Original en lengua Quechua
